రేణిగుంట తహసీల్దార్ శ్రావణ్ కుమార్‌కు ఘన సన్మానం

రేణిగుంట మండల తహసీల్దార్‌గా ఇటీవల బాధ్యతలు స్వీకరించిన శ్రావణ్ కుమార్ ను ఎమ్మార్పీఎస్ రాష్ట్ర ఉపాధ్యక్షుడు చక్రపాణి శనివారం తహసీల్దార్ కార్యాలయంలో మర్యాదపూర్వకంగా కలిసి శాలువాతో ఘనంగా సన్మానించారు. నూతన బాధ్యతలు చేపట్టిన సందర్భంగా శుభాకాంక్షలు తెలియజేస్తూ, ప్రజలకు మరింత చేరువగా ఉంటూ పారదర్శకమైన పరిపాలన అందించాలని ఆకాంక్షించారు. ఈ సందర్భంగా చక్రపాణి మాట్లాడుతూ రెవెన్యూ శాఖ ప్రజలకు నేరుగా సేవలందించే అత్యంత కీలకమైన విభాగమని అన్నారు. తహసీల్దార్ కార్యాలయానికి ప్రతిరోజూ భూ సమస్యలు, ఆదాయ ధృవీకరణ పత్రాలు, కుల ధృవీకరణ పత్రాలు, పాస్‌బుక్‌లు, భూ రికార్డులు, వారసత్వ నమోదు, ప్రభుత్వ సంక్షేమ పథకాల అమలు వంటి అనేక సమస్యలతో ప్రజలు వస్తుంటారని గుర్తు చేశారు. అలాంటి ప్రజల సమస్యలను ఆలస్యం చేయకుండా పారదర్శకంగా పరిష్కరించాల్సిన బాధ్యత రెవెన్యూ అధికారులపై ఉందన్నారు. ముఖ్యంగా నిరుపేదలు, రైతులు, బడుగు బలహీన వర్గాల ప్రజలకు న్యాయం జరిగేలా చట్టబద్ధంగా సేవలు అందించాలని కోరారు. ప్రభుత్వం ప్రజలకు అందిస్తున్న సంక్షేమ పథకాలు నిజమైన అర్హులకు చేరేలా అధికారులు ప్రత్యేక దృష్టి సారించాలని, కార్యాలయానికి వచ్చే ప్రతి ఒక్కరిని ఆప్యాయంగా పలకరించి వారి సమస్యలను ఓర్పుతో విని పరిష్కరించే విధంగా పనిచేయాలని ఆకాంక్షించారు. రేణిగుంట మండలం వేగంగా అభివృద్ధి చెందుతున్న ప్రాంతమని, పారిశ్రామిక, పట్టణ, గ్రామీణ ప్రాంతాలు కలిసి ఉన్న ఈ మండలంలో రెవెన్యూ శాఖ పాత్ర మరింత కీలకమని పేర్కొన్నారు. ప్రజలకు ఇబ్బందులు లేకుండా సేవలు అందించడం ద్వారా ప్రభుత్వంపై ప్రజల్లో మరింత విశ్వాసం పెరుగుతుందని అన్నారు. నూతన తహసీల్దార్ శ్రావణ్ కుమార్ సమర్థవంతంగా పనిచేసి మండల ప్రజల మన్ననలు పొందాలని, ప్రజల సంక్షేమమే లక్ష్యంగా విధులు నిర్వహించాలని కోరుతూ ఆయనకు హృదయపూర్వక శుభాకాంక్షలు తెలిపారు. ఈ సందర్భంగా తహసీల్దార్ శ్రావణ్ కుమార్ మాట్లాడుతూ, తనపై ఉంచిన నమ్మకానికి అనుగుణంగా ప్రజలకు పారదర్శకమైన, జవాబుదారీతనంతో కూడిన పరిపాలన అందించేందుకు కృషి చేస్తానన్నారు. ప్రభుత్వ నిబంధనలకు అనుగుణంగా ప్రతి అర్జీని పరిశీలించి, అర్హులైన వారికి న్యాయం జరిగేలా చర్యలు తీసుకుంటామని తెలిపారు. కార్యాలయానికి వచ్చే ప్రతి ఒక్కరితో మర్యాదపూర్వకంగా వ్యవహరిస్తూ ప్రజా సమస్యల పరిష్కారానికి ప్రాధాన్యత ఇస్తామని స్పష్టం చేశారు. ఈ కార్యక్రమంలో ఎమ్మార్పీఎస్ నాయకులు,తదితరు పాల్గొన్నారు.