క్రీస్తును అనుసరించడం మాటల్లో కాదు... కనికరంతో జీవించడంలో కనిపిస్తుంది....

గాయాలను చూసి దాటిపోవడం సులభం... గాయపడిన మనిషిని చేరుకోవడమే నిజమైన ప్రేమ.

మనిషి జీవితంలో జ్ఞానం, ఆస్తి, హోదా కంటే గొప్పది ప్రేమతో కూడిన కనికరం. బైబిలులో యేసుక్రీస్తు చెప్పిన “మంచి సమరయుని ఉపమానం” మనిషిని మనిషిగా నిలబెట్టేది కనికరమేనని తెలియజేస్తుంది.

ఒక వ్యక్తి యెరూషలేము నుండి యెరికోకు వెళ్తుండగా దొంగల చేతికి చిక్కాడు. వారు అతని వస్త్రాలు తీసుకొని, తీవ్రంగా కొట్టి, చావుబతుకుల మధ్య రోడ్డుపై వదిలి వెళ్లిపోయారు. కొంతసేపటికి ఒక యాజకుడు ఆ మార్గంలో వచ్చాడు. గాయపడిన వ్యక్తిని చూసినా అతనికి సహాయం చేయకుండా దాటిపోయాడు. తరువాత ఒక లేవీయుడు కూడా అదే విధంగా వెళ్లిపోయాడు.

అయితే సమాజంలో తక్కువగా చూడబడిన ఒక సమరయుడు అక్కడికి వచ్చాడు. గాయపడిన వ్యక్తిని చూసి అతని హృదయం కనికరంతో నిండిపోయింది. అతని గాయాలకు మందు వేసి, తన గాడిదపై ఎక్కించి ఒక విడిదికి తీసుకెళ్లాడు. అతని సంరక్షణ కోసం ఖర్చును కూడా స్వయంగా భరించాడు.

ఈ ఉపమానం ద్వారా యేసుక్రీస్తు మన పొరుగువాడు ఎవరో కాదు, మనము ఎవరికైనా పొరుగువారిగా ఎలా మారుతున్నామన్నదే ముఖ్యమని బోధించారు. నిజమైన భక్తి ఆరాధనా మందిరంలో మాత్రమే కనిపించదు; అవసరంలో ఉన్నవారికి చేయూతనిచ్చే చేతుల్లో కనిపిస్తుంది.

నేటి సమాజంలో మన చుట్టూ ఎన్నో గాయపడిన హృదయాలు ఉన్నాయి. కొందరు ఆకలితో, కొందరు ఒంటరితనంతో, మరికొందరు నిరాశతో జీవిస్తున్నారు. వారిని చూసి దాటిపోవడం సులభమే. కానీ వారి బాధను మన బాధగా భావించి ముందుకు వెళ్లి ఆదుకోవడమే క్రీస్తు మనకు నేర్పిన జీవితం.

దేవుడు మనపై చూపిన కనికరాన్ని మనం ఇతరుల జీవితాల్లో ప్రతిబింబించాలి. ఒక ప్రేమతో కూడిన మాట, ఒక ఆదరణ, ఒక సహాయం, ఒక ప్రార్థన—ఇవన్నీ ఎవరి జీవితాన్నైనా మార్చగలవు. కనికరంతో చేసే ప్రతి కార్యం దేవుని ప్రేమకు సాక్ష్యంగా నిలుస్తుంది.

“మనకు కనికరం చూపిన దేవుని పిల్లలమైతే, మన కనికరం ద్వారా ఈ లోకం దేవుని ప్రేమను చూడాలి.”

(లూకా సువార్త 10:25–37).

Ammiti Sunil Miltonson,
CSI Deenulaalayamu Kalikiri.