హృదయాలోచనలు - మనుషుని వశము

విత్తనం ఎంత శ్రేష్ఠమైనదైనా, అది పడిన నేల సరిగ్గా లేకపోతే వృక్షం కాజాలదు.
ప్రతిరోజూ మన జీవితాల్లో జ్ఞానం, ప్రేమ మరియు కొత్త అవకాశాలు అనే విత్తనాలు చల్లబడుతూనే ఉంటాయి. కానీ ఒకే సలహా నలుగురి జీవితాలను వేర్వేరుగా మారుస్తుంది. ఎందుకంటే, ఫలితం అనేది విత్తనంపై మాత్రమే కాదు, అది పడిన నేల స్వభావం పై ఆధారపడి ఉంటుంది. మన హృదయమే ఆ నేల. మనం ఎదగాలంటే, మన అంతరంగం ఎలాంటి నేలగా ఉందో తెలుసుకోవాలి.

1. కఠినమైన హృదయం (స్వీకరించలేని తనం):-

గట్టి పడిన దారిపై పడిన విత్తనాలను పక్షులు ఎత్తుకెళ్తాయి. అలాగే, మనసును కఠినంగా, అనుమానంతో ఉంచినప్పుడు మంచి మాటలు పైపైనే ఉండిపోతాయి. హృదయం తెరుచుకోకపోతే, జీవితంలో లభించే గొప్ప అవకాశాలు మనల్ని మార్చేలోపే చేజారిపోతాయి.

2. లోతు లేని హృదయం (స్థిరత్వం లేకపోవడం):-

రాతి నేలలో పడిన విత్తనాలు త్వరగా మొలకెత్తినా, లోతైన వేర్లు లేక ఎండకు ఎండిపోతాయి. కేవలం తాత్కాలిక ఉత్సాహంతో మొదలుపెట్టి, కష్టాలు రాగానే ఆపేసే స్వభావం ఇది. పట్టుదల, క్రమశిక్షణ లేకపోతే ఎంత గొప్ప ఆశయమైనా ఆవిరైపోతుంది.

3. ఆందోళనలతో నిండిన హృదయం (అనవసరమైన ఒత్తిడి):-

ముళ్ల పొదల్లో పడిన విత్తనాలు ఊపిరాడక చనిపోతాయి. మంచి ఆశయాలు ఉన్నప్పటికీ జీవితంలోని ఆందోళనలు, ధన దాహం, ఇతరులతో పోల్చుకునే మానసిక ఒత్తిళ్లకు చోటిస్తే, ఆ ముళ్ళు మీలోని నిజమైన సామర్థ్యాన్ని అణచివేస్తాయి.

4. సారవంతమైన హృదయం (ఫలించే స్వభావం):-

మంచి నేలలో పడిన విత్తనం లోతుగా వేరూనుకుని నూరు అంతలుగా ఫలిస్తుంది. విన్నదాన్ని అర్థం చేసుకుని, ఓపికతో ఆచరించే మనస్సు ఇది. సరైన వాతావరణం లభిస్తే, ఒక చిన్న మంచి ఆలోచన మీ జీవితాన్ని, మీ చుట్టూ ఉన్నవారిని ఉన్నత స్థాయికి తీసుకెళ్తుంది.
నిలకడగా ఉండండి, ఎదుగుదల సాధ్యమవుతుంది.
ప్రస్తుతం మీరు ఉన్న మార్గం స్పష్టంగా లేకపోయినా, సహనంతో నిలకడగా ఉండటం నేర్చుకుంటే, ఒక నూతన వెలుగు చిగురిస్తుంది.
దేవుని వాక్యమనే విత్తనానికి ఏ లోటూ లేదు. కానీ ఆ విత్తనం మీ జీవితంలో ప్రయోజనకరంగా మారాలా లేక వ్యర్థమైపోవాలా అనేది మీరు ఎంచుకునే హృదయమనే నేల పైనే ఆధారపడి ఉంటుంది.
మీరు మీ హృదయాన్ని వాక్యానికి లోబడేలా, ఓపికతో నిలబడేలా ఉంచుకుంటే, ఎంతటి శ్రమ ఎదురైనా మీరు దేవుని కృపలో బలంగా, అనేకమందికి ఆశీర్వాదకరంగా, ఆత్మ ఫలాలతో సమృద్ధిగా ఫలించే వ్యక్తిగా మారతారు.
ఈ రోజు దేవుడు మీ ముందే ఈ మార్గాన్ని ఉంచాడు.

మీ హృదయాన్ని కఠినంగా మార్చుకుంటారో, ఆందోళనల ముళ్లలో నలిగిపోతారో, లేదా దేవుని వాక్యానికి లోబడి సమృద్ధిగా ఫలించే మంచి నేలగా మారతారో, ఆ ఎంపిక పూర్తిగా మీదే! (మత్తయి సువార్త 13:1-23)

S. Oshin Wenona
CSI Town Church, Guntakal