జనన, మరణ ధ్రువీకరణ పత్రాలకు కొత్త రూల్స్‌.. ఆలస్యమైతే ఇక అంత ఈజీ కాదు!

రాజనీతి | న్యూఢిల్లీ | అక్టోబర్‌ 1, 2026

జనన, మరణాలను సకాలంలో నమోదు చేసుకోవడంపై కేంద్రం మరింత కఠినమైన నిబంధనలు అమల్లోకి తీసుకొచ్చింది. Registration of Births and Deaths (Amendment) Act, 2026 అక్టోబర్‌ 1 నుంచి అమల్లోకి వచ్చింది. ఇక జననం లేదా మరణం జరిగిన తర్వాత రిజిస్ట్రేషన్‌లో జాప్యం పెరిగే కొద్దీ అదనపు ధ్రువీకరణలు, అధికారుల ఆదేశాలు అవసరం కానున్నాయి.

21 రోజుల్లో నమోదు చేస్తే సులభం
అక్టోబర్‌ 1 నుంచి మారిన నిబంధనలు.. ఏడాది దాటితే అధికారుల ఆమోదం, రెండేళ్లు దాటితే మేజిస్ట్రేట్‌ ఆర్డర్‌ తప్పనిసరి

జననం లేదా మరణం జరిగిన 21 రోజుల్లోపు నమోదు చేసుకుంటే సాధారణ ప్రక్రియలోనే రిజిస్ట్రేషన్‌ చేసుకోవచ్చు. ఆలస్యం చేయకుండా ధ్రువీకరణ పత్రం పొందడం వల్ల భవిష్యత్తులో విద్య, ఉద్యోగం, వారసత్వం, బీమా, ఇతర ప్రభుత్వ సేవలకు సంబంధించిన పనుల్లో ఉపయోగపడుతుంది.

ఏడాది నుంచి రెండేళ్ల మధ్య అయితే..

జననం లేదా మరణం జరిగిన ఒక సంవత్సరం దాటిన తర్వాత.. రెండేళ్లలోపు రిజిస్ట్రేషన్‌ కోసం దరఖాస్తు చేస్తే సంబంధిత జిల్లా మేజిస్ట్రేట్‌, సబ్‌-డివిజనల్‌ మేజిస్ట్రేట్‌ లేదా అధీకృత ఎగ్జిక్యూటివ్‌ మేజిస్ట్రేట్‌ ఆదేశం అవసరం. అధికారులు సమర్పించిన వివరాల సరైనదో కాదో పరిశీలించిన తర్వాతే రిజిస్ట్రేషన్‌ ప్రక్రియ ముందుకు సాగుతుంది.

రెండేళ్లు దాటితే మరింత కఠినం

ఇక రెండేళ్లకు మించి ఆలస్యమైన జనన, మరణాల నమోదుకు జ్యుడిషియల్‌ మేజిస్ట్రేట్‌ ఫస్ట్‌ క్లాస్‌ (JMFC) ఆదేశం తప్పనిసరి. సంబంధిత వివరాలను ధ్రువీకరించిన తర్వాతే ఆదేశాలు జారీ అవుతాయి. ఆ తర్వాతే రిజిస్ట్రార్‌ వద్ద నమోదు పూర్తవుతుంది.

దేశవ్యాప్తంగా అమలు

ఈ సవరణ Registration of Births and Deaths Act, 1969లోని ఆలస్య నమోదుకు సంబంధించిన నిబంధనలను కఠినతరం చేస్తోంది. జనన, మరణాల నమోదును నిర్ణీత సమయంలోనే పూర్తి చేయడం, ఆలస్యంగా వచ్చే దరఖాస్తుల్లో వివరాల ఖచ్చితత్వాన్ని నిర్ధారించడం ప్రధాన ఉద్దేశంగా కేంద్రం పేర్కొంది.

ప్రజలు గుర్తుంచుకోవాల్సింది ఇదే..

కుటుంబంలో జననం లేదా మరణం జరిగితే వీలైనంత త్వరగా అధికారికంగా నమోదు చేయించుకోవడం ఇక మరింత ముఖ్యమైంది. ముఖ్యంగా పాత జనన, మరణాలను ఇప్పటివరకు నమోదు చేయకపోతే ఆలస్యాన్ని బట్టి అదనపు అధికారిక ప్రక్రియ ఎదురయ్యే అవకాశం ఉంది.

సమయం గడిచే కొద్దీ ప్రక్రియ పెరుగుతుంది.. కాబట్టి జనన, మరణాల నమోదు విషయంలో ఆలస్యం చేయకుండా చర్యలు తీసుకోవడం అవసరం.