అన్నమయ్య జిల్లాను కరవు జిల్లాగా ప్రకటించాలి

పీలేరు సెప్టెంబర్ 11 (రాజనీతి): అన్నమయ్య జిల్లాలో నెలకొన్న కరువు పరిస్థితుల నేపథ్యంలో రైతులు, కౌలు రైతులు, వ్యవసాయ కూలీలు, గ్రామీణ ప్రజలను ప్రభుత్వం తక్షణమే ఆదుకోవాలని ఏపీ రైతు సంఘం జిల్లా కార్యదర్శి వంగిమళ్ల రంగారెడ్డి, సీపీఐ జిల్లా కార్యవర్గ సభ్యుడు సాంబశివ డిమాండ్ చేశారు. ఈ మేరకు శుక్రవారం పీలేరు తహశీల్దార్‌కు వినతిపత్రం అందజేశారు. కరువు ప్రభావిత ప్రాంతాల్లో ఉచిత పశుగ్రాసం, 100 రోజుల ఉపాధి హామీ పనులు, నిత్యావసర సరుకుల పంపిణీ చేపట్టాలని కోరారు. రైతులు, కూలీలను నిర్లక్ష్యం చేస్తే పెద్దఎత్తున ఉద్యమిస్తామని హెచ్చరించారు.