పీలేరు ఎస్‌కేఆర్ ఆసుపత్రి వ్యవహారంపై జిల్లా వైద్యాధికారులు స్పందించాలి

రాజనీతి పీలేరు ఆగస్టు 28:-

★ సురేంద్ర (42) మృతి ఘటనపై సమగ్ర, నిష్పాక్షిక విచారణకు ఆదేశించాలి
★ గత ఆరోపణలు, ఫిర్యాదులపైనా విచారణ జరపాలి
★ వైద్య నిర్లక్ష్యం తేలితే కఠిన చర్యలు తీసుకొని బాధిత కుటుంబానికి రూ.1 కోటి రూపాయలు పరిహారం ఇవ్వాలి
★ విచారణ పూర్తికాకముందే ఆసుపత్రి యాజమాన్యం లేదా వైద్యులను దోషులుగా ప్రకటించడం తమ ఉద్దేశం కాదని అమృత్ తేజ స్పష్టం

పీలేరు,అన్నమయ్య జిల్లా:

పీలేరులోని ఎస్‌కేఆర్ ఆసుపత్రిలో కె.వి.పల్లి మండలం జాండ్రపేటకు చెందిన కె.సురేంద్ర మృతి చెందిన ఘటనపై జిల్లా వైద్య, ఆరోగ్య శాఖ అధికారులు తక్షణమే స్పందించి సమగ్ర, నిష్పాక్షిక విచారణ చేపట్టాలని NSUI రాష్ట్ర ఉపాధ్యక్షులు మద్దెల అమృత్ తేజ డిమాండ్ చేశారు.

ఈ సందర్భంగా అమృత్ తేజ మాట్లాడుతూ కిడ్నీలో రాళ్లకు చికిత్స కోసం ఎస్‌కేఆర్ ఆసుపత్రిని ఆశ్రయించిన సురేంద్రకు మత్తు మందు ఇచ్చే సమయంలో ఆరోగ్య పరిస్థితి విషమించిందని, అనంతరం ఆయనను తిరుపతిలోని స్విమ్స్ ఆసుపత్రికి తరలించగా అక్కడి వైద్యులు మృతి చెందినట్లు నిర్ధారించారని కుటుంబ సభ్యులు చెబుతున్నారని ఆయన తెలిపారు.

ఈ ఘటనపై ఇప్పటికే ప్రజల్లో తీవ్ర ఆందోళన, అనేక అనుమానాలు వ్యక్తమవుతున్నాయని అన్నారు. ఒక రోగి చికిత్స కోసం ఆసుపత్రికి వెళ్లిన తర్వాత పరిస్థితి విషమించి ప్రాణాలు కోల్పోయేంత వరకు అసలు ఏం జరిగిందో ప్రతి దశను అధికారులు వెలుగులోకి తీసుకురావాల్సిన అవసరం ఉందన్నారు.

మత్తు మందు ఇచ్చిన దగ్గర నుంచి స్విమ్స్ వరకు ప్రతి అంశంపైనా విచారణ చేయాలి అని డిమాండ్ చేశారు.సురేంద్ర ఆసుపత్రిలో చేరిన సమయం నుంచి స్విమ్స్‌కు తరలించే వరకు జరిగిన ప్రతి వైద్య ప్రక్రియను నిపుణుల బృందంతో సమగ్రంగా పరిశీలించాలని అమృత్ తేజ డిమాండ్ చేశారు.

సురేంద్రకు నిర్వహించిన ప్రాథమిక వైద్య పరీక్షలు, రక్త పరీక్షలు, స్కానింగ్/ఇమేజింగ్ నివేదికలు, వైద్యుల నిర్ధారణ, ఆపరేషన్ లేదా చికిత్సకు తీసుకున్న నిర్ణయం, చికిత్సకు ముందు నిర్వహించిన పరీక్షలు, మత్తు మందు ఇవ్వడానికి తీసుకున్న జాగ్రత్తలు, మత్తు మందు పేరు, మోతాదు, ఇచ్చిన సమయం, ఎవరు ఇచ్చారు, మత్తు వైద్య నిపుణుడి పర్యవేక్షణ ఉందా లేదా వంటి అంశాలను పరిశీలించాలన్నారు.

అలాగే మత్తు మందు ఇచ్చిన తర్వాత నమోదైన బీపీ, పల్స్, ఆక్సిజన్ స్థాయి, హృదయ స్పందన, శ్వాస పరిస్థితి, ఇతర వైటల్ పారామీటర్లు, ఆరోగ్య పరిస్థితి విషమించిన సమయం, ఆ సమయంలో అందించిన అత్యవసర వైద్యం, ఉపయోగించిన మందులు, ఇంజెక్షన్లు, ఆక్సిజన్, వెంటిలేటర్ లేదా ఇతర లైఫ్ సపోర్ట్ అవసరమైందా లేదా ఇతర ప్రాణరక్షణ చర్యలు చేపట్టారా వంటి అంశాలను కూడా పరిశీలించాలని కోరారు.

అదేవిధంగా కేస్ షీట్, పేషెంట్ ఫైల్, నర్సింగ్ నోట్లు, మందుల చార్ట్, వైద్యుల నోట్లు, అత్యవసర చికిత్స రికార్డులు, మత్తు వైద్య రికార్డులు, ల్యాబ్ రిపోర్టులు, స్కానింగ్ రిపోర్టులు, ఆపరేషన్‌కు సంబంధించిన రికార్డులు, రిఫరల్ నోట్, డిశ్చార్జ్/రిఫరల్ సమ్మరీ, అంబులెన్స్ రికార్డులు, ఆసుపత్రి నుంచి బయలుదేరిన సమయం, స్విమ్స్‌కు చేరుకున్న సమయం వంటి అన్ని వివరాలను అధికారులు సేకరించి పరిశీలించాలని డిమాండ్ చేశారు.

ముఖ్యంగా మత్తు మందు ఇచ్చే ముందు మరియు తర్వాత సురేంద్ర ఆరోగ్య పరిస్థితిలో వచ్చిన మార్పు ఏమిటి? పరిస్థితి విషమించిన వెంటనే ఆసుపత్రి సిబ్బంది అనుసరించిన వైద్య ప్రోటోకాల్ ఏమిటి? అవసరమైన అత్యవసర సదుపాయాలు అందుబాటులో ఉన్నాయా? మరో ఆసుపత్రికి తరలించే నిర్ణయం ఎప్పుడు తీసుకున్నారు? అప్పటికే రోగి పరిస్థితి ఎలా ఉంది? అనే కీలక ప్రశ్నలకు నిపుణుల విచారణ ద్వారా సమాధానాలు రాబట్టాలని అమృత్ తేజ అన్నారు.

ఎస్‌కేఆర్ ఆసుపత్రిపై గతంలో కూడా ఆరోపణలు, ఫిర్యాదులు ఉన్నట్లు ప్రజల్లో చర్చ జరుగుతోందని అమృత్ తేజ అన్నారు. గతంలో ఎన్ని ఫిర్యాదులు వచ్చాయి? వాటిపై అధికారులు ఎలాంటి తనిఖీలు నిర్వహించారు? ఏమైనా విచారణలు జరిగాయా? ఆసుపత్రి నిబంధనలు పాటిస్తోందా లేదా పరిశీలించారా? ఏమైనా లోపాలు గుర్తించారా? గుర్తిస్తే ఎలాంటి చర్యలు తీసుకున్నారు? అనే అంశాలపై జిల్లా వైద్యాధికారులు ప్రజలకు స్పష్టత ఇవ్వాలని డిమాండ్ చేశారు.

ఒక వ్యక్తి ప్రాణం కోల్పోయిన తర్వాత మాత్రమే అధికారులు మేల్కొనే పరిస్థితి ఉండకూడదన్నారు. ప్రజల నుంచి వచ్చే ఫిర్యాదులపై ముందుగానే స్పందించి, అవసరమైన తనిఖీలు నిర్వహించి, తప్పులు ఉంటే అప్పుడే చర్యలు తీసుకోవాల్సిన బాధ్యత అధికారులపై ఉందన్నారు.

ఈ ఘటనపై ప్రజల్లో తీవ్ర అనుమానాలు ఉన్నప్పటికీ, విచారణ పూర్తికాకముందే ఆసుపత్రి యాజమాన్యం లేదా వైద్యులను దోషులుగా ప్రకటించడం తమ ఉద్దేశం కాదని అమృత్ తేజ స్పష్టం చేశారు.

అయితే కుటుంబ సభ్యులు లేవనెత్తుతున్న ప్రశ్నలకు సమాధానం చెప్పాల్సిన బాధ్యత అధికారులపై ఉందన్నారు. ఎలాంటి ఒత్తిళ్లకు తలొగ్గకుండా, పారదర్శకంగా, నిష్పాక్షికంగా నిపుణుల వైద్య బృందంతో విచారణ జరిపి వాస్తవాలను ప్రజల ముందుంచాలని డిమాండ్ చేశారు.

సురేంద్ర మృతికి దారితీసిన పరిస్థితులపై పూర్తి స్థాయి విచారణ జరిపి, వైద్య నిర్లక్ష్యం, చికిత్సలో లోపం లేదా నిబంధనల ఉల్లంఘన జరిగినట్లు విచారణలో నిర్ధారణైతే బాధ్యులపై కఠినమైన చట్టపరమైన చర్యలు తీసుకోవాలని అమృత్ తేజ డిమాండ్ చేశారు.

అదేవిధంగా వైద్య నిర్లక్ష్యం కారణంగానే సురేంద్ర మృతి చెందినట్లు అధికారిక విచారణలో నిర్ధారణైతే, బాధిత కుటుంబానికి కనీసం రూ.1 కోటి పరిహారం హాస్పిటల్ యాజమాన్యం ద్వారా అందించేలా ప్రభుత్వం చర్యలు తీసుకోవాలని కోరారు.

జిల్లా వైద్యాధికారులు, వైద్యశాఖ మంత్రి తక్షణమే స్పందించి ఎస్‌కేఆర్ ఆసుపత్రిపై ప్రత్యేక తనిఖీలు నిర్వహించడంతో పాటు ఆసుపత్రి అనుమతులు, వైద్య సిబ్బంది అర్హతలు, అత్యవసర వైద్య సదుపాయాలు, మత్తు వైద్యానికి సంబంధించిన సదుపాయాలు, రోగుల భద్రతా ప్రమాణాలు, గత ఫిర్యాదులు, ప్రస్తుత ఘటనకు సంబంధించిన పూర్తి వైద్య రికార్డులను పరిశీలించాలని డిమాండ్ చేశారు.

“సురేంద్ర కుటుంబానికి జరిగిన నష్టం తిరిగి పూడ్చలేనిది. కానీ ఈ ఘటనకు సంబంధించిన నిజాలు బయటకు రావడం, బాధ్యులు ఎవరైనా ఉంటే వారిపై చర్యలు తీసుకోవడం, భవిష్యత్తులో మరొక కుటుంబం ఇలాంటి పరిస్థితిని ఎదుర్కోకుండా చూడడం ప్రభుత్వ బాధ్యత. సురేంద్ర కుటుంబానికి న్యాయం జరిగే వరకు NSUI ప్రజల పక్షాన పోరాడుతుంది” అని మద్దెల అమృత్ తేజ స్పష్టం చేశారు.

జిల్లా వైద్యాధికారులు, వైద్యశాఖ మంత్రి తక్షణమే స్పందించి సమగ్ర విచారణకు ఆదేశించకపోతే NSUI ఆధ్వర్యంలో ప్రజాస్వామ్యబద్ధమైన, చట్టబద్ధమైన తీవ్ర నిరసన కార్యక్రమాలు చేపట్టాల్సి వస్తుందని మద్దెల అమృత్ తేజ హెచ్చరించారు.