115 అంగుళాల స్క్రీన్‌తో ఇంట్లోనే థియేటర్ అనుభూతి

రాజనీతి టెక్ డెస్క్ | ఆగస్టు 4, 2026

4K 120Hz డిస్‌ప్లే, 12 స్పీకర్లు, ట్రూ RGB టెక్నాలజీతో ప్రీమియం BRAVIA 9 II భారత మార్కెట్లోకి

భారత ప్రీమియం టెలివిజన్ మార్కెట్‌ను లక్ష్యంగా చేసుకుని సోనీ తన ఇప్పటివరకు అతిపెద్ద హోమ్ టెలివిజన్‌ను ఆవిష్కరించింది. 115 అంగుళాల BRAVIA 9 II మోడల్‌ను భారత మార్కెట్లో విడుదల చేసింది. అత్యాధునిక True RGB బ్యాక్‌లైట్ టెక్నాలజీ, 4K రిజల్యూషన్, 120Hz రిఫ్రెష్ రేట్, శక్తివంతమైన 12-స్పీకర్ ఆడియో సిస్టమ్ వంటి ఫీచర్లతో ఈ టీవీ హోమ్ థియేటర్ అనుభూతిని అందిస్తుందని కంపెనీ పేర్కొంది.

కొత్త BRAVIA 9 IIలో సోనీ ప్రత్యేకంగా అభివృద్ధి చేసిన RGB Backlight Master Drive Pro టెక్నాలజీని ఉపయోగించింది. దీంతో రంగులు మరింత సహజంగా కనిపించడంతో పాటు, అధిక ప్రకాశం, మెరుగైన కాంట్రాస్ట్, లోతైన నలుపు రంగు, స్పష్టమైన చిత్ర నాణ్యత లభిస్తుందని కంపెనీ వెల్లడించింది. సినిమా, స్పోర్ట్స్, గేమింగ్ వంటి కంటెంట్‌ను మరింత వాస్తవికంగా వీక్షించేందుకు ఈ టెక్నాలజీ ఉపయోగపడుతుందని తెలిపింది.

ఈ టీవీలో Google TV ఆపరేటింగ్ సిస్టమ్ అందుబాటులో ఉండటంతో పాటు Google Assistant, Chromecast, Dolby Vision, Dolby Atmos, HDMI 2.1, VRR, ALLM వంటి ఆధునిక ఫీచర్లు కూడా ఉన్నాయి. గేమింగ్ కోసం PlayStation 5కు అనుకూలంగా ప్రత్యేక ఆప్టిమైజేషన్‌ను కూడా అందించింది.

ఆడియో పరంగా 12 స్పీకర్ల వ్యవస్థను ఏర్పాటు చేసిన సోనీ, థియేటర్ స్థాయి ధ్వని అనుభూతి కలిగేలా Acoustic Multi-Audio+ టెక్నాలజీని ఇందులో పొందుపరిచింది. పెద్ద స్క్రీన్‌తో పాటు శక్తివంతమైన ధ్వని కారణంగా ప్రత్యేక హోమ్ థియేటర్ అవసరం లేకుండానే ప్రీమియం వినోద అనుభూతిని అందిస్తుందని కంపెనీ పేర్కొంది.

ఈ 115 అంగుళాల BRAVIA 9 II టీవీకి ఎంఆర్పీ రూ.45.99 లక్షలు కాగా, బెస్ట్ బై ధర రూ.28.99 లక్షలుగా నిర్ణయించినట్లు సోనీ వెల్లడించింది. భారత మార్కెట్లో అత్యంత ఖరీదైన ప్రీమియం టెలివిజన్లలో ఇది ఒకటిగా నిలవనుంది.